പിന്നിട്ട ഒരു വർഷക്കാലം പ്രതിദിനം നടന്നുവരുന്ന സഹസ്ര ദീപാലങ്കാരവും മാസ ആദ്യ ഞായറാഴ്ചകളിൽ നടന്നുവരുന്ന 32000 വിശേഷാൽ ദീപങ്ങളും ഈ ചതുർബാഹു മഹാവിഷ്ണുസവിധത്തെ ദിവ്യ തേജസ്സിലേക്ക് ഉയർത്തിയ മംഗള യജ്ഞമായി തീർന്നിരിക്കുന്നു. ദശലക്ഷ ദീപ സമർപ്പണ സമാപനം 2024 ഏപ്രിൽ 28 ഞായറാഴ്ച വൈകിട്ട് ഒരു ലക്ഷം ദീപം കൊളുത്തി ദീപാരാധനയോടെ ഭഗവത്പാദത്തിലേക്ക് സമർപ്പിച്ച് സമാപനം കുറിക്കുകയാണ്.

കോഴിക്കോട് ജില്ലയിലെ ആദ്യ പഞ്ചായത്തായ അഴിയൂർ, പോണ്ടിച്ചേരിയിലെ മാഹിയുടെയും കണ്ണൂർ ജില്ലയുടെയും അതിരുകൾ പങ്കിടുന്ന ഒരു കൊച്ചു ഗ്രാമം അവിടെ അഴിയൂരപ്പനായി വസിക്കുന്ന നൂറ്റാണ്ടുകൾ പഴക്കമുള്ള പുണ്യപുരാതന മഹാവിഷ്ണു ക്ഷേത്രം 1700 കാലഘട്ടത്തിൽ ബ്രിട്ടീഷുകാരുടെയും ഫ്രഞ്ചുകാരുടെയും പോർച്ചുഗീസുകാരുടെയും സർവ്വോപരി ടിപ്പുസുൽത്താന്റെയും അധിനിവേശത്തോടെ ക്ഷേത്രം തകർക്കപ്പെടുകയും 1900 തിന്റെ മധ്യത്തോടെ പുനരുദ്ധാരണ പ്രവർത്തനങ്ങൾ ഉണ്ടാവുകയും ക്ഷേത്ര ഊരായ്മ സിദ്ധിച്ച കോയമ്മ മഠം ഇല്ലത്തിന്റെ നേതൃത്വത്തിൽ പരിപാലിച്ചു പോരുകയുമാണ്.